Wie het vir jou gesê dat jy naak is?

Daar's 'n ironie in die Genesis-verhaal wat ons maklik mis. Wanneer God vir Adam vra "Wie het vir jou gesê dat jy naak is?" (Gen 3:11). Dit gaan dit nie regtig oor klere nie – dit gaan oor die oomblik toe kwesbaarheid van 'n seën na 'n vloek verander het. Adam en Eva was voorheen "naak sonder skaamte," (Gen 2:25) maar skielik het hulle weggesteek. Die vraag wat God vra, is eintlik: Hoekom dra jy 'n masker wat nie jy is nie? 

Jy vertel ‘n leuen vir jouself oor wie jy is.

Die Hebreeuse taal gee ons 'n belangrike wenk: die woord vir "naak" (ערם) klink byna dieselfde as "slim" (ערום – die woord wat vir die slang gebruik word). Hier lê die ironie: die soeke na slimheid lei tot skaamte en wegkruipery. Ons eie planne dien ons nie altyd nie. Adam se slimheid kon nie sy menswees regverdig nie. Ware wysheid lê eerder in die eenvoudige eerlikheid oor wie jy is.

Kwesbaarheid is nie swakheid nie – dit is moed. 

Dit is die moed om jou wegkruip te los en te sê: "Hier is ek, gebreek en al." 'n Ou Chassidiese verhaal vertel die volgende: 'n Rabbi se pragtige kruik breek onderpad huis toe. In plaas van om te huil, dans hy van vreugde. Sy studente vra hoekom. Hy antwoord: "Nou kan ek die water self sien. Voorheen het ek net die kruik gesien."

Dis presies dit. 

Ons "kruike" – ons perfekte fasades waarmee ons wegkruip  – moet soms breek voordat ons die ware water kan sien: wie ons werklik is. Noem die wegkruip sommer ego of die vals self. Die teenoorgestelde van kwesbaarheid is verdediging, en verdediging hou ons gevange in oppervlakkige verhoudings.

God se vraag aan Adam is eintlik 'n sagmoedige uitnodiging – kom nader aan die waarheid oor jouself. God sê eintlik: "Adam, kom ons praat oor wat jy vir jouself vertel." Soos Spreuke sê: "Soos 'n mens binne homself bereken (beteken ook weeg), so leef hy uiteindelik ook." Die stories wat ons vir onsself vertel, vorm ons werklikheid.

Die diepste kwesbaarheid is om eerlik na jouself te luister – na die stemme in jou kop, na die vrese wat jou laat wegkruip, na die skaamte wat sê jy's nie goed genoeg nie. Want as jy nie na jouself kan luister nie, gaan jy nie na ander kan luister nie.

Kwesbaarheid is die poort na ware intimiteit. Genesis is die storie van God wat kom kuier en na mense verlang. Om werklik liefgehê te word – deur God en deur ander – moet ons onsself toelaat om gesien te word vir wie ons werklik is. Dit beteken om die "blare" af te haal en die pynlike waarheid van ons wonde te deel.

Die vraag bly: Wie het vir jou gesê dat jy naak is? God gebruik die vraag om Adam te help om sy eie innerlike stemme te hoor. Jou antwoord sal dieselfde as Adam sin wees - slimheid wat jou laat glo jy moet perfek wees om aanvaar te word. Maar dalk is dit tyd om te dans wanneer die kruik breek, want dan kan jy die water sien wat opspring tot in die ewigheid.

-Theo Geyser