Ons glo by InVia dat kontemplasie nie sonder aksie kan bestaan nie. Ons droom dat elke bediening binne InVia ook die Ander sal insluit en opofferings sal maak om mense in nood deur liefde by te staan. Lees ook meer oor ons nuwe "Ek was honger"-projek:

​

• Ons is dankbaar dat ons die laaste 6 jaar elke jaar kinders van Perrivale, Kayamandi, Cloetesville en Kylemore kon borg om Bergskool te doen en hulle ook op die langtermyn te ondersteun met hulle lewens oorgange. 

• Die laaste 4 jaar is Wilma en 'n span vrywilligers ook betrokke by die Vineyard Kinderhuis se 4 huise in Cloetesville en Kayamandi.  Dit behels gereelde uitstappies en 'n jaarlikse vakansie, geskenke en partytjie met elke kind se verjaarsdag asook deurlopende ondersteuning aan die kinders. Indien jy op enige manier ‘n verskil wil help maak in hierdie kinders se lewe, kontak gerus vir Wilma Geyser by wilmageyser@gmail.com

• InVia het ook hierdie jaar vir die eerste keer vanuit ons musiekbediening se Woordfeesfonds R60 000 beskikbaar gemaak om kunstenaars gedurende Covid-19 te ondersteun. 

• Sedert Covid-19 het ons 'n Covid-19 aksie begin. Ons het betrokke geraak in Vlaeberg, Kayamandi en Cloetesville om mense in nood te ondersteun. Ons het begin om Mageu met vitamiene en aanvullings aan te koop vir mense wat ‘n behoefte gehad het aan ‘n maaltyd met genoegsame voedingswaarde. 

• Uit die Mageu-verspreiding het InVia 3 Mama's ontmoet wat elke dag vir ongeveer 400 mense kos maak. Ons het ruim ondersteuning uit die gemeenskap ontvang en kon groente, vrugte, en verskeie soorte kos vir hierdie voedingskemas gee. Die geskenk aan InVia was die wonderlike vriende wat ons die afgelope jaar binne hierdie gemeenskappe kon maak.

• InVia help ook mense om hulle huidige besighede te ondersteun of nuwes te begin. Ons help tans met twee Kleuterskole, een 'Pop-up' restaurant, ‘n haarkapper en ‘n bestuurskool.

​​

Tans is behoorlike voeding en werk een van die grootste behoeftes in ons land en ook binne hierdie gemeenskappe. Ons ondersoek tans maniere hoe ons hierdie behoeftes binne ons land kan aanspreek. Dankie vir julle ruim harte wat mense se lewens diep raak.

​

Indien jy op enige manier wil help, kontak ons gerus by inviagemeente@gmail.com