InVia Woorfees-gesprekreeks: Ont-doof
- inviagemeente
- Oct 8
- 2 min read
Dis Woordfees en ons dorpie gaan propvol mense wees! Stellenbosch bars letterlik uit sy nate elke Oktober tydens die fees.
Ses jaar lank is InVia deel van die Woordfees. Ons probeer om deur mooi woorde en dieper vrae nader te kom aan die wetenskap, kuns en spiritualiteit van kontemplasie. Die afgelope jare het mooi dinge gebring – sale wat propvol was, kaartjies wat goed verkoop het. Die geld het ons gebruik om kunstenaars te ondersteun met wie ons vriende is, waar daar werklike nood was.
Hierdie jaar is ons werklik bevoorreg. Die Johann Brink Trust het dit moontlik gemaak dat ons Skrootwerf-evangelie: Gebroke hallelujas en verroeste belydenis kan aanbied. Dit gebeur in die HMS Bloemhof Sentrum. Komende Sondag gesels Frieda met my oor die bekendstelling van my boek, Ontdoof: Fluisterings in Stilte en op 19 Oktober gesels ek met Carel Antonissen oor sy boek, Stilweg.
Nou iets oor my boek...
Vir meer as tien jaar het ek 'n besondere pad geloop saam met jong mense in Kaapstad. Hierdie boek vertel die verhaal van 'n geloofsgemeenskap wat ons InVia noem.
Tydens my PhD-studie in Nederland het ek 'n fassinerende vraag ondersoek: Hoe vind jong stadsmense wat van tradisionele geloof weggedryf het, hulle geestelike pad in 'n wêreld wat so verskriklik jaag?
Hulle onwaarskynlike kompas?
Stilte.
Hierdie boek is nie 'n gids tot 'n toweragtige openbaring nie. Dit is 'n eerlike, rou verkenning van geloof, gevorm deur die verhale van 17 besondere jongmense. Hulle rebelleer teen 'n lewe vol afleiding, spoed en vals inligting.
Ek begin met my eie verhaal van stilte. Dit het jare geneem voordat ek dit verstaan het – en nog langer om dit werklik te ervaar.
In my navorsing het ek op iets onverwags afgekom: Vier eenvoudige fases of bewegings wat wys hoe mense stilte beleef. Ek het dit grondig ondersoek – vanuit neurologie, teologie, sielkunde en antropologie.
En elke keer het dit teruggekom na een ding:
Stilte verander jou.
Maar dit begin met stryd.
Dan los jy.
Dan raak jy een.
Dan verander jy.
Dit is, kortliks, die vier fases.
Ek hoop die boek help jou om te hoor wat agter die geraas wag. Daar vind jy rus. Daar maak jou keuses sin. Daar is die waarheid nie meer versteek nie.
- Theo Geyser
